دور المره غلب على دور رجلها = يمشي بحكمتها ومنهار الاعصاب

هذي القصيده تحكي عن غلا المهور
وعن حكم النسا على الرجال
مابي اطول عليكم القصيده تعبر عن نفسها
هذى القصيده للوالد الشاعر سلمان قعدان السليس رحمه الله



سرياقلم واكتب على السطر ماطاب = اكتب على سطر الورق رمز الاعجاب
عندي على رد التماثيل موهبه = يلعبها فكري على كل هنداب
اليا بغيت اقرا عرفت القرايه = واليا بغيت اكتب بعد صرت كتاب
وأسباب ماقلته وهيض قريحتي = تعاطي البغضا من بين الاقراب
راع النقيلي بينهم شد ميزره = والكل زعل من دون برهان واسباب
والعيب الاخر يالعقول السليمه = حكم النسا من فوق عكفان الاشناب
دور المره غلب على دور رجلها = يمشي بحكمتها ومنهار الاعصاب
وان جاء عليها يرفع الصوت صاحت = وقامت بهد البيت مع شلع الاطناب
والها بنفس الوقت قاضي وميد = والزوج لو يحتج يقولون كذاب
ماله معاون قامو الناس ضده = ولاله جدا الا عضة الكف بالناب
واصبح بيته شايف الغبن صابر = لافاتح (ن) باب ولامغلق باب
واليا استجوزت بنته وزوج نسيبه = قال ارضهن وارضا بلا قيد وحساب
وجت العجوز وعينها تقدح الغضب = وتحد خوصتها للتقطيع الارقاب
يامرحبا من يوم تبغا فلانه= وابرك نهار (ن)جيتنا فيه خطاب
ولابه زواج(ن) لين تكمل شروطي = قبل الملاك تجيبهن نقد وحساب
وشهي شروطك جعل ربي يعيني = والله يعاوني على حل الاصعاب
درع الدروع وهات معها معرى = وحزام ابو دورين فاخر وجذاب
وكرسي جابر غير طقم القصايص = اللي على الهامه تركب بمقضاب
واربع درازن من مصاغ الغوايش = وكفين مع خصرين وطقوم والعاب
انا صديقاتي يبن الهدايا = ولاهيب تكفي مير قدرت الانساب
وعود لعمه قال كبرت مصيبتي = فنن عليه فن تأديب وارهاب
ثم قال عمه ماتدخل بشرطهن = ولا اسقيك مويه حقهن حق غصاب
وراح وتدين من اهل الربح بالربا = وحطو ا عليه الطاق طاقين ماهاب
كسر وجبر لين كمل زواجه = ودور السنه ياقع ورى شبك الانشاب
عجز يسدد ورفعوله قضيه = وصكوا عليه الباب في السجن بقضاب
وغلق سنه في داخل السجن مودع = وحليلته بقيت بلا زوج وانجاب
وهل رمضان وفي اخره يطلب الفرج = يبغا الفرج من من ترجاه ماخاب
وفكوا سراحه كاسبين الحساني = اللي لهم عادات بعتق الارقاب
ماني مبالغ قصة (ن) واقعيه = وعيب تبين ماتغطيه الاسلاب
قول العتيبي يوم غنا بقافه = الله يقديني على كل ماصاب
وصلو على خير البرايا محمد = ختام مانظمت بحروف الاعراب

صح الساااااانك

ورحم الله قائلها واسكنه فسيح جناته

قصيده اجتماعيه تستحق النشر

وتتكلم عن معضله ولكن للاسف لا احد يعتبر
كل الشكر نوجهه لكل شيخ وكل شاعر وكل كاتب يهتم بهذه القضيه


مشكور اخوي يوسف

ونتطلع الجديد


اخوك
مرزوق الجعيد

رحمه الله

والله انه جاب الصحيح والواقع المرير الان

لكن الله يعين العزوبي على زواجه

عتيبي عفيف

مشكور اخوي يوسف على نقلك لهذه القصيدة الرائعة للشاعر الكبير/سلمان بن قعدان " الله يرحمه"

ومنتظرين المزيد من القصايد لهذا الشاعر المبدع


تحياتي

الله يرحمك يا ابو يوسف

قصيده في قمة الروعه

تحكي واقع مرير((للعزوبي))

مشكور يا يوسف والله يعطيك العافيه

تقبل ازكى تحيه

مشكور


وصح لسان الشاعر


والله يرحمة ويرحم أموات المسلمين


تحياتي ...