فقد بعض الذرى والعـراوي

صعب القوافي ماعصاني علاوى= اسوقها وانا عليها رهاوي
عديت مزموماً على أرضن نزاوى=يوحش خلاه وحوله الذيب عـاوي
حصاه سودن مثل رؤوس السماوى=التهلكه حوله هي أقـرب حـراوي
دارن نبيها دونها الذيـب خـاوى=رقـن سباريتـه تغـر الهقـاوي
يالجتـي لجـة ذيابـن تـعـاوى=تبغى عشاها من قطيع الشـواوي
لها ثلاث أيـام مـن دون مـاوى=حتى طواها من عنا الجوع طـاوي
أشوف فكري والهواجس تخـاوى=كأني غريبن عن ديـاره جـلاوي
حسبت قلبي عن دروبـه تشـاوى=وأثره على درب الصبايا نحـاوي
بلاه من نجلـن هدبهـا تسـاوى=على طرف خدن من الزيـن راوي
حرك أضلوعي لين راحت تهـاوى=بيتن فقد بعض الذرى والعـراوي
قامت تلاويـه الهبايـب أمـلاوى=شدو أنزول الحي وأمسى خـلاوي
تسمع مع أرواقه نسيمن تصـاوى=شملا هواها صلف والليل ضـاوي
زيرانها مـن عصـر ماتنتقـاوى=منها الشجر راحت أغصونه حناوي
هـذا مثـل والجـرح ماينتـداوى=ألن لنظر عينـي طبييـن مـداوي
إللـي كلامـه لا تكلـم حــلاوى=أحلى وألذ من العسيـل النقـاوي
لغضا بخـدن تقـل بـراق نـاوى=شلـع خفوقـي مابقالـه شـلاوي