قصيدة للشاعر/ عوض بن شمطان ابوثنتين

قصيده للشاعر الأستاذ / عوض بن شمطان ابوثنتين في حفل قبيلته القساسمه لتكريم الشيخ / قايد العازمي
والشيخ/ سعد الذيابي


مرحبا ترحيبةٍ مثل المطر مبداها
مثل همال السحاب و وابل البارودي


بالرجالٍ اللي نصونا والسعد يبراها
نورت دارٍ نصيتوها وفاح العودي


مرحبا ثم مرحبا مليون لو قلناها
ما توفي قدركم بالطيب والمجهودي


بسم ربعي مرحبا والطيب من مبداها
لابةٍ وقت المواقف فعلها محمودي


ليلةٍ فيها السعادة والفرح يملاها
جعل حزات الفرح دايم تجي وتعودي


ليلةٍ ما في الليالي مثلها شفناها
نورها برق السحاب وريحها كمبودي


اتخير في الكلام الزين لجل لحاها
واحشمه عن كل ميل ونقدة المنقودي


مرحبا بكل الشيوخ مزبنة من جاها
الشيوخ اللي لصكات الزمان جنودي


يا مطوعة الصعاب وطبها وِدْواها
ياهل الراي السديد وماقفٍ مشهودي


مع بياض أفعالها تندى كفوف إيداها
مكرمين الضيف بالحايل مع المفرودي


والمدح يرقى سنود وغايته يلقاها
في رجال الطيب والمعروف وأهل الزودي

مثل ابن مجهز سعد والطيبة ينصاها
رايته بيضا وفعله بالكرم معدودي


والمكارم عند ابن مناع حاز أقصاها
كنه يوصف على هداج رمز الجودي


كل مازادت هقاوينا ورا مرماها
زادوا أصحاب الشكالة من ورا المقصودي


فعلكم سابق وأهل الطيب ما ننساها
لابةٍ من طيبها هبت هبوب النودي


بيض الله وجه من مثله سعى مسعاها
جعلكم في ذا الوجود ولا عليكم زودي


لو أعدد في مساعيكم عجزت احصاها
جعلها بميزانكم ياكاسبين الجودي

ما انتهى بيت القصيد ولاكمل معناها
لو ما وقتي وساعات اللقا محدودي


سدد الله في مساع الخير كل اخطاها
والثناء والشكر لله ربنا المعبودي