دارٍ ابهـا المشهـور مصـري وفــلاح

قصيده قالها الشاعر الكبير

شقير الجذع

وهو في مصر

واترككم مع القصيده التي تشرح نفسها بنفسها






اليـوم انـا قلبـي علـى خـف وجنـاح=مـا عـاد يبغـى مصـر شطـه ونيلـه

حتيـش لـو يطلـع بمنـجـى وتـفـاح=وحتيـش لـو فيـه العمـايـر طويـلـه

دارٍ ابهـا المشهـور مصـري وفــلاح=مـا حـدٍ يعـد اصلـه ولا لـه قبيـلـه

ربـعٍ تضيـف ضيفهـا رجـل وجنـاح=واطيبهـم اللـي جـاب ديــكٍ يشيـلـه

اشتالـه البـركـان والصـبـح منـبـاح=وعـوض مبانيـهـا الرفيـعـه نثيـلـه

ويصبح صحن صاحي من النزل صحصاح=وينجابـه اللـي خالقـة يعتـنـي لــه

ينجابـه اللـي فيـه يأمـر بـالاصـلاح=ومـن لايخـاف الله عسـى الله يزيـلـه

دارٍ انساهـا لبسهـا شــرب وشـبـاح=والـلـي يحاكيـهـا تـقـف وتحكيـلـه

يمشـن والاسـلاب مـن قــدم فـتـاح=وانــا دخـيـل الله منـجـي دخيـلـه

ماجيـت لـه ياسيـد البيـض ســواح=ولـولاك والله يـا الغـضـي ماعنيـلـه

ولو قلـت لـك مرتـاح مانـي بمرتـاح=يعلـم بـه اللـي كــل هــمٍ يزيـلـه

وصبرت لاجـل دواك ياضبـي الابـراح=هـذي مـن السـفـره ثلاثـيـن ليـلـه

اقعد من المغـرب ليـا نـور الاصبـاح=القلـب كنـه فـوق حـامـي المليـلـه

قلبـي قفـل ولـه الهواجيـس بمفـتـاح=ليـا صـدر هاجـوس الاخـر يجيـلـه

صبرت صبر ايـوب ليـن الصبـر راح=راح الكثـيـر ولا بـقـى الا قلـيـلـه

قلبـي كمـا طيـرٍ دعيـلـه بـمـرواح=هـواه نجـد وجلستـي ويــش هيـلـه

وجـداه يـا شمـة ذعـاذيـع الاريــاح=فـي نجـد غـب مـروحٍ سـال سيلـه

مـن الحجـاز ليـا شـروره والاسيـاح=مـا بـه شعـيـبٍ مـاتـدارج مسيـلـه

ديـرة مكسـرة الجنـابـي والارمــاح=مـاهـو بــدار مصلحـيـن البليـلـه

دارٍ بهـا عشنـا شريفـيـن وصـحـاح=مـا قيـل ذي جربـا وهــذي عليـلـه

يازينهـا لـو عيشهـا صعـب وكـفـاح=وياحلوهـا لــو شربـهـا حنضليـلـه

ويامـا حلـى فيهـا ولـد بـاش سـراح=سجـه ومـع بعـض الرجـال تعليـلـه

في مجلـسٍ هرجـه سواليـف ومـزاح=والـنـار تشـعـم والمسـيـر يجيـلـه

والكبش جابه من هل المـرح الاشحـاح=من ضـان ربـاط العصـا فـي صميلـه

وقـال اقلطـوا ياعيـال عـن الشبطـاح=ورمـى الشـوا بيـن الحطـب والنثيلـه

لا مـن طيـر النبـت غـب النبـا نـاح=هـذي طـرات العـمـر والله وكيـلـه

ويازيـن فيهـا جلسـتٍ قبـل الامـراح=صـافٍ قمرهـا غـب نــو المخيـلـه

فالعبلـه اللـي رملهـا تـقـل مسـبـاح=ابيـض كمـا اللولـو والاحمـر مثيلـه

يعطيـك بألـوانـه تشاكـيـل وألـمـاح=مثـل الـخـرز ومشـاركـه دق نيـلـه

ارضٍ عليهـا مشـي الاقـدام يـرتـاح=سجـتٍ قـدم بالنعـل ماتحـتـري لــه

ليا ذعـذع الغربـي وريـح النفـل فـاح=سقـوى سقـى الله سجـت فيـه ليـلـه

بأطـراف قطعانـن تمرجـح تمـرجـاح=ترعـى فـالارض قفـرٍ خـلا مولفيلـه

يقهـر لـه المقهـور سرحـه ومـرواح=وتكسر على صـوت الحـوار وعويلـه

وتـرازمٍ لفـواق مــن ذود مـصـلاح=ودرهــم بمحـلابـه ونـفـذ شليـلـه

وقرب لهن ماعـون ليـن الرغـو سـاح=مــا كـنـه الا بالـوقـايـا يسـيـلـه

اثن البطون السـداس مجهـم ومضيـاح=ومـن لا كسبـهـن ساعـتـه عزتيـلـه

حتيـش لـو يكسـب ملاييـن الاربـاح=تعبـان قـلـب وراس يـومـه وليـلـه

يتـعـب وتاكلـهـا قليلـيـن الافــلاح=نـاسٍ تجـي بعـده وتنـسـى جميـلـه

ومرقـد العمـر الفنـا ويــن مــاراح=فـراشـه الطـيـن وغـطـاه النثيـلـه

وتطلع ملايكـة العمـل بيـض الالـواح=وتخسـر بهـا اعمـال اليديـن البخيلـه

ويخسر بها اللي يعمـل الجـرم منـزاح=تــوه بــدا ولا لـيـالـه طـويـلـه

مثـل البهيـم ليـا شبـع فالحيـا صـاح=لمتـلـى بطـنـه تـزايـد صهـيـلـه

وليا غـاب بطنـه صـار للحـق نفـاح=مايكـتـب الا الناقـصـه والفشـيـلـه

لاخايـفٍ ربــه ولا طــاع نـصـاح=يلعـبـه الشيـطـان بـيــا وسـيـلـه

نـذل يبـى بالجـرم شـهـرة ومــداح=يرضـى شياطيـنـه ويـزعـل كفيـلـه

وهذاك حظـه لـو صعـد للعـلا طـاح=جـزاه نـار مـا عمـل تحتـري لــه






تحياتي للجميع

الله اكبر

..

صح لسان العملاق ابو جمآل
قصيده كسابق قصائده
الروعه والجماآل عنوانها

الف شكر
محبك
.

صح لسانه متميز شقير الجذع علم ..

مشكوووورين يالغالين على المرور...

قصيده روعه للشاعر العلم /

شقير بن عقيل الجذع ..

صح لسانه .

وتسلم يداك ياعبدالعزيز ..
...

قصيـــدة راااائــــعة يا عبدالعزيز ..
صـــــح السانــــــه .. وسلمت يمينك على النقل الجميل

الله يعطيك العافيــــــة يالغالي

مشكووورين يالغالين على المرور الجميل...