اهداء الى ادارة المنتدى والاعضاء والزوار

الشعـر لـه فاتـل وناقـض وفـاروق =والسـوق لـه سايـم وشـاري وبـايـع

واللي ربح ببضاعتـه يمـدح السـوق =والنـاس تطلـب نــادرات البضـايـع

يامدور الطيـب تخيـر علـى الـذوق =واحفظ معك مـن قـول فـارس ودايـع

لو كـان بالارشـاد والنصـح مسبـوق =ذكـرى لعـل لهـا تــرق السمـايـع

جواهر معهـا شـذى المسـك مرفـوق =ومعهـا التجـارب مثبـتـه بالوقـايـع

واللي لبس من جوهر المرجلـه طـوق =مثلـي مـجـرب والتـجـارب نفـايـع

سافرت لي طرقة وطبيـت لـي سـوق =وخاويـت فـي دربـي جميـع النزايـع

والله خلـق فالنـاس ميـزات وفـروق =النـاس شـتـى بالشـيـم والطبـايـع

احـد علـى مبـدا ولـه نظـره فـوق =واحـد كمـا ثلـج علـى القـاع مايـع

ولاني وكيـل ادم علـى كـل مخلـوق =لكـن اشـوف بخلـق ربــي نـوايـع

اشفق على الطيب ولـي رفقتـه شـوق =غريـب والا مـن قـريـب الجمـايـع

وراع الردى من دونـه البـاب مغلـوق =بينـي وبيـن اهـل السفـالـه قطـايـع

الطيب واهل الطيب عاشـق ومعشـوق =والطيـب لـه مبـدا وحكـم وشـرايـع

والمرجله وهبـه مـن الـرب ووفـوق =والـديـن راس المرجـلـه والطمـايـع

والرزق من ربي وله فـرض وحقـوق =ومن يطلب ارزاقه مـن الخلـق ضايـع

والاخـذ بالاسبـاب ثابـت ومـوثـوق= وتوفيـق ربـي هـو خيـار الـذرايـع

ولاكـل مطـرود كمـا قيـل ملحـوق =قـول مبالـغ فيـه لـو كـان شـايـع

ان ماجلبهـا والـي العـرش برفـوق =كثـر المـطـارد مايـحـوش النفـايـع

ومن يحسن النيه مع النـاس مـرزوق =ومـن يتقـي ربـه دروبــه سنـايـع

والكـذب ثـوب مـا يجمـل ومشقـوق =ولاينـرفـي شـقـه بكـثـر الرقـايـع

ومن لايحـط اسـرار قلبـه بصنـدوق =ويجـود المفتـاح عـن كـل صـايـع

يفتح علـى نفسـه مداخـل وخـازوق =وقناصـه الفرصـه تـزيـد الجـلايـع

ومن يقـرب الانـذال لا يامـن البـوق =النـذل خايـن مـا يصـون الـودايـع

عقرب ثـرى والا كمـا نـاب زاروق =لا صـادف الـغـرات للـسـم زايــع

واحـذر تـرى النمـام للشـر ناتـوق =دايــم يـقـرب للـشـرار الـولايـع

من المكـارم خـارب القصـد مسلـوق= وعقلـه لنزغـات الشياطـيـن طـايـع

وترى الردي شمع على الحيط ملـزوق= لا اونس حميـم الشمـس جـاك متمايـع

احذف ردي المعرفـه حـذف خملـوق =لاتنـخـدع بالـزبـرقـه واللـمـايـع

عليك بالطيـب ليـا صـرت مزنـوق =الـلـي فعـولـه كلبـوهـا روايـــع

يشيل عنك مـن الصعيبـات طـاروق =ولا يلحـق المنـه جمـيـل الصنـايـع

لامن عن الواجـب هبـا كـل مزلـوق =يـقـوم بالـواجـب بعـيـد الرمـايـع

والشارب اللي ساعه الضيـق محلـوق= وقت الرخاء ما احـد يبـي لـه فزايـع

خله ولو شفته علـى الوجـه مصفـوق =ولاتستشـيـر مجالسـيـن الـربـايـع

وان كان في صدرك قنا الوقت مـزروق =خلـك علـى الشـده قــوي البتـايـع

واضرب على الكايـد لايلحقـك عـوق =واطلـع سنـود وخيـر ربـك طـلايـع

والشمس لو غابت يجي صبح وشـروق= والحق لـه صيـت مـع النـاس ذايـع

يقدم عزيز السـاس لـو كـان مفهـوق =وياخـذ عظيمـات المـراجـل قـلايـع

وأبليـس اخـو مـره مربـط ومفلـوق =وفـي كـل يـوم يـزود حـر ولقايـع

نركي علـى كبـده مراقيـع وحـروق =وعـروق قلبـه مـن وحمنـا مـزايـع

وصلوا على الهادي عدد ما أرمش الموق= وعسـى لنـا مـن جـود ربـي شفايـع

اولآ اللهم صلي وسلم على نبينا محمد وعلى اله وصحبه ومن اهتدى بهديه الى يوم الدين


الله الله ماشالله عليك عزالله انك كفيت و وفيت يالغآلي بيض الله وجهك


وصح لسانك وياجعل من جابك للجنه وجزآآآك الله خيرآآآآ

اشهد بالله انها جواهر



صح لسانك و علا شانك



موفق خيرو فالك الجنه

الله اكبر ... اللهم صل على محمد وعلى ال محمد وعلى صحبه ومن سن بسنته ..!!

صح لسانك .. وبيض الله وجهك ... درر الله ينصرك .. أخوكـ : الدجيماااء ..!!!

صح لسانك واعتلى شانك

لاهنتوا على المرور وتحياتى لكم

الله الله

صح لسااااااانك على هذه الدره


قصيده لايكتبه سوى شاعر كبير


لك مودتي وتقديري

مشاري لاهنت على المرور وتحياتى لك

لاهنتوا جميعا على المرور وهذه القصيده لشاعر فارس العصيمي وتحياتى لكم

صح لسان فارس وبيض الله وجهك يالذيب واهنيك على ذائقتك المميزه

صح لسانك يانجد العرب وبيض الله وجهك ولاهنت

ابو صنهوت لاهنت على المرور وتحياتى لك