القهوة

الشيخ هايس بن مجلاد من شيوخ قبيلة عنزة تطرق لوصفها ومن يستحقها في قصيدته الشهيرة :






قم سو ما يصبغ على الصين لذياب=بـدلال يشـدن البطـاط المحاديـب
احمس اليا من العـرق فوقهـا ذاب=واستدن مايجذب عليك الشواريـب
نجرن يصيح من الطرب تقل بحجاب=يصبر على طول الدهر للمواجيـب
واليا انطلق من مذلقه كنه خضـاب=ورس ٍ صبغ بكفوف بيض الرعابيب
صبه لمن قـاد السبايـا للأجنـاب=له مفرس ٍ يشبع به الطير والذيـب
والثاني اللي يا لفـا بيتـه ركـاب=قدام بيته تقـل مجـزر قصاصيـب
والثالث اللي يا غشا الزمل ضبضاب=يرخص بعمره دون زمل الرعابيـب
وباقي العرب يكفيهم التول لو شاب=قضابة المقعـد حميـر المشاعيـب
اللي نهار الكون يفـزع بمصـلاب=كبار النفوس وساهجيـن المواجيـب










والشيخ عجران بن شرفي السبيعي له هذه الأبيات الجميلة :




يا فهيد صك النجر يوحيك بتـال=صكه كفـاك الله جميـع الأذايـا
استدن نجر في الدهر يعول اعوال=اعوال سبـع حاديتـه الضرايـا
وعليه كيف لي من البن فنجـال=جعل الرخوم ونسلها لـك فدايـا
وعده لحماي النوايـب والأثقـال=في الضيق لامن إلتقـن المنايـا
واللي يحزب زاد بيته ليا اكتـال=وحط المعاني الطيبة لـه شرايـا
واللي ليا رد البرا بين الأعمـال=لا رفعـوا لقطيهـن بالهـوايـا
واللي يروي حربتـه بالتجيـوال=له عادةٍ يرخص سمـان العطايـا
وباقي العرب خله ولو كان زعال=هذا وبالمجلـس كثيـر الحكايـا



هذي قصيدة قديمة للشاعر مدوخ بن ضمنه وهي عن نقد ( وصف) القهوة العربيه
أحببت أشارككم بها إن شاء الله تعجبكم



البـــن كــيـــفه عــند من يشترونه=والمشكل اللي جــابها من بلدها
يامــســـوي الفـــنجال لاتحرقونه=واحذر عن الشعلة تعدي صمدها
حتى يـجيك مــحــمــر كــــن لونه=مـحـــة جــراده طاير من جسدها
عـــده على اللي ماضيات طعونه=زبن اللــدوح اللي تـرادا جــهدها
وعده عــلى اللي لابته يـدهلونه=في ربــعة من راح منها حـمـدها
وعـده على اللي لابــته يـتـبعونه=مع دربه الخلفه تــفاخت ولــدها
وكفه عن اللي عند فرقه بشونه=يمسي ويصبح ضابط لك عددها
وعلى ربـــوعه طـــــايرات عيونه=ان باع شاته جاك حزة وعـــدها





وهذه القصيده الرائعه .. لمبارك بن عبيكه بن رمال




قم يالمقهوي دن نجر ومحماس =واحمس لنا من حب صنعا نماها
احمس وزين حمسة البن بقياس =دقــه ولقمهـا وعـجل سواهـا
وصبه لممرور على الخيل مدباس=تقفي عنه صم الرمك لانصاها
من فوق ماتاخذ على الخيل مرواس=لاجدعت خبثات الانفس حذاها
واثنه لمن حوله على الزبر جلاس=اهل السموت اللي بعيد مداها
ابن عبيكه هرجته مابها باس=تطرب لها كرام اللحى من حلاها
طول الجدار وقصرة الرجل نوماس=لا صار ما للرجــل داع دعاهــا
تصير بعيون الرفاقه معك باس=لاصار ماتدعى تره من عناها
يصير قالات ويصير لولاس =ونوبن من الادنين ياتي بلاها
قلبك يصير ويضرب القلب عوماس=والنفس تقدح عقب زايد غلاها
خلك على بابك تقل لون حراس=لاجو عليهن محترين عشاها
لاجن مع الخل الشمالي لها اضراس=والكل تشكي رجلها من حفاها
نرحب بهم من قبل تجديع الالباس =ونقلط لهم تمر الحلا من نماها
ونذبح لهم كبش مربى بالاطعاس=ونقلطه من قبل يقرب مساها
هذي سلوم جدودنا قبل من راس=واللي بعدنا كــان ربي هداهـا

والله الواحد اذا ماشربها يصكه راسه ومثل ماقال خلف والله لو من وراء صنعاءعنيناله يعطيك العافيه وشكر خاص من ابو جزا العصيمي

مشكور نجم شامي .. ولا هنت يالغالي