يارب انا طالبك

يارب انا طالبك يارب الارباب = ما غيرك اطلب حاجتي منه ويجيب
تغفر ذنوب ٍ مالها عد واحساب = في ظنتي مثل الجبال المراقيب
احسن ختامي يا رجاء كل مرتاب = واكتب لي الفردوس من دون تعذيب
والبارج الهوجاس فكّيت له باب = واشغلت فكر ٍ ما يطيق الهناديب
استعرض سنيني بعد عارضي شاب = و اراجع الماضي كثير المصاعيب
من ما مضى علمني الوقت ما هاب =واخذت من وقتي دروس وتجاريب
كم هقوة ٍ منتوجها خاب ما طاب = وياما بنيت احلام فالوقت وتخيب
ومن البشر سايرت الادنين واجناب = عرفت فرق الناس شفت التعاجيب
احد ٍ يشرّف 0 ناهته راس مرقاب = كريم سبلاً ما ينوشه عذاريب
واحد ٍ ردي العزم من سايره خاب = نقال هرج 0 امناه حش العراقيب
ومنهم طليق حجاج للقلب نهّاب = ضاري على الجودات راعي تراحيب
ومنهم خبيث الطبع للحقد جلاّب = على الفتن مقدام يوش المشاهيب
وفيهم عزيز ٍ نفقده كل ما غاب = وكم حاضر ٍ مفقود شوفه عواقيب
وفيهم شوير ٍ للحليله له اشناب = لكن فرقاء 0 من شبيه الرعابيب
وابهم عوارف فالمهمات واصلاب = زبن المصّيح محتمين المطاليب
وابهم قريب ٍ فالظهر دق منساب = لا عدت يا وقت ٍ غثيث المشاريب
هذي تجارب عشتها ماش مجناب = والخافي اعظم فالمحاني لواهيب
يارب عفوك يوم تفريق الاحباب = وصلوا على المختار خير الاصاحيب
متعب ثواب الجعيد