أبيات في حب الجار وبكا لفراقه وتوجد لعودته

إهداء لكل جار عزيز على قلبي

يالله يامنشي صدوق المخيلي=يامجيب موسى يوم صلى وناداك
طالبك أنا عفوك بيوم مهيلي=طالبك أنا يارب رحمتك ورضاك
يامحيي الميت ومشف العليلي=يارازق المخلوق وامدير الأفلاك
طالبك ترزقنا برزق جزيلي=لا صرّ عنا خايب الناس الأبواك
*****
يالآدمي لن كان حظك امحيلي=أدع الذي خالقك من ماش وأحياك
يعطيك ربي من عطاه الفضيلي=مامنّ مثل الناس لا أعطاك مذاك
يالآدمي لياك تنصا البخيلي=لو تطلبه ماأعطاك لو عود مسواك
أنص الذي بالجود كفه يسيلي=لا ضامتك دنياك بالعون شافاك
اللي ليا ثقلت حمولك يشيلي=راع الوفا حطه على الدوم يمناك
واليا طرا المقيال ظله ظليلي=ون هبت النكبا عن البرد ذرّاك
واليا نخيته فز.. سيفه صقيلي=حطه على اليمنى ولو كثروا اعداك
*****
ياجار قررت السفر والرحيلي=الله من سوّ المقادير ياقاك
يحماك ربي كل يوم وليلي=اللي حمى يوسف دعيناه يحماك
صعب عليّ امفارقك ياخليلي=وأقسى عليّ اليوم ياجار فرقاك
ياجار أنا لك مالقيت البديلي=يحرم ولا يوجد مثيلك وشرواك
بعدك أروح لمن.. منهو يجيلي=من هو ونيسي بعدكم لاعدمناك
ياجار عقبك صار ليلي طويلي=ساهر وأخايل نجمتينن بالأفلاك
أنشد نجوم الليل وين الزميلي=وأقول ماعينت ذيبان ماجاك
كانك تشوفه قله إني عليلي=وشفاي بعد الله بشوفك ولاماك
شوف الصديق اللي لهمي يزيلي=ويزول هم القلب لاجات ذكراك
ياجار عقبك صرت كني هبيلي=ماغير أنشّد عنك ذولا وذولاك
أنشّد الجيران وأبن السبيلي=وأدوّر الأخبار من يوم مسراك
روحت من عندي وحملك ثقيلي=جاوبت ذيب عاوين يوم ناداك
ياجار جاوبته طويت الصميلي=واسعد دار يالعتيبي تضّواك
أنشهد إنك يالمشبب دليلي=لا عمست أريا الناس ماعمست أرياك
عندك ملاذ لكل جال ذليلي=لا صكته بقعا تذكرك ثم جاك
يلقى ذرا له يازبون الدخيلي=وأنت الذي مابعت دينك بدنياك
*****
ياجار كيف أنساك وأنته عميلي=حلفت أنا ماأنساك ياجار ماأنساك
ياجار كثر الناس عندي قليلي=من بدّهم قلبي يعزّك وخاواك
خاويت أنا سرحان راع العويلي=اليا عوا غداك دسمن وعشاك
ذيب اطبوعه مايدان المقيلي=دايم على روس المراقيب سمّاك
يسر الليالي دوم يهذل هذيلي=وكم واحدن ياذيب جاوبك بعواك
*****
ياجار غيرك ماحدن يستويلي=أنت الذي ياجار قلبي تمناك
الجار نعم الجار ماله مثيلي=جار السعد ون جاك ياقلب هناك
ليتك أتعوّد يالحصان الأصيلي=ترجع لدار فيه حيك ومرباك
مالك بدار الحسد دار الهضيلي=دار بها تاس تحط الك الأشراك
ياجار عوّد يمنا لاتحيلي=ليّاك تنسى دار الأكرام ليّاك
دار بها الكعبه بناها الخليلي=وفي وسطها ياجار عرقك ومجناك
بين الهضاب وبين عرق النثيلي=ربّاك عود ماخسر يوم رباك
وأمك برور لك لبنها يسيلي=ترجي نهار فيه مدّتك بيداك
لاتقطع الرجوى تميل وتعيلي=هاذي وصية من تهيض ووصاك
وأنته فهيم ماتتوه الدليلي=ترقى المعالي للطويلات مرقاك
مرقا صعيب عنّه عجز الذليلي=كبار العلابي مامشت ربع ممشاك
لا جا نهارن فيه قدح الفتيلي=رمحك امضرا دوم ماأخطيت مرماك
وصلاة ربي عد وبل المخيلي=واعداد ماغنى حمام على راك
على نبي يوم جمع الحصيلي=شفيعنا المختار في يوم الأدراك
*****

سفر بن مشعان الغبيوي

صح لسانك يالغبيوي


قصيده رائعه في الجار


تحياتي لك

صح بدنك أخو فيصل ،،

لك تحيــاتــــــــــــي

....
عزّالله انك اجزلت يالغبيوي
صح لسانك
قصيده كتبت بحروف ذهبيه..
تحياتي

شكرا لك يامرزوق على هذا الأطراء الفذ والذي يدل حسن ذوقك
والعين ماتعلى على الحاجب يابن العم

تحياتي لك

سفر بـن مشعـان الغبيـوي

بيض الله وجهك وصح السانك

تحياااااااااااااااااتي

سفر بن مشعان الغبوي صح لسانك وانا اشهد بالله انك اجزلت بالقصيده وقصيده ترف لها القلوب وتحن لها الاسماع
وتقبل تحياتي واعجابي

شكر اً على القصيدة أخوي سفر متعتنا بالقصيدة لله درك

وصح لسانك

تحياتي

أشكر لكم جميعا طيب الكلمات

دائما مايخرج من القلب من كلمات تكون معبره وتكون أصدق

لكم تحياتي

صح لسااااااانك ياسفر


جزله

والجار الطيب يستااااااااهل

تقبل تحيااتي

سفربن مشعان الغبيوي بيض الله وجهك على هذه القصيده الجزله من شاعر جزل،،

الأخ ذيبان والأخ الشاهر

شكرا لكم جميعا وصحت أبدانكم ولكم وافر وأزكى تحياتي

أخوكم / أبو طلال

مشكور على هذه القصيده الرائعه

مشكور قصيده جميله

صح لسانك

وبيض الله وجهك

قصيده تستاهل الاعجاب والشكر

الأخ الحويماني،،، الأخ عناد ،،، الأخ الفراهيدي

أشكركم جميعا على مروركم وكلماتكم الطيبه وثنائكم

ولكم أزكى تحياتي

احسنت
موضوع جدير
وقصيد معبر

شكرا لك على مرورك أخوي حسين الودعاني

وصح بدنك يالغالي

لك تحياتي